ក្រុមហ៊ុនសែលកាតរៀបចំទទួលស្វាគមន៍គណៈប្រតិភូរាជរដ្ឋាភិបាលដើម្បី បង្ហាញជូននូវបច្ចេកវិទ្យា 5G | សែលកាត

ក្រុមហ៊ុនសែលកាតរៀបចំទទួលស្វាគមន៍គណៈប្រតិភូរាជរដ្ឋាភិបាលដើម្បី បង្ហាញជូននូវបច្ចេកវិទ្យា 5G

ថ្ងៃចេញផ្សាយ: កុម្ភៈ, ថ្ងៃ​សុក្រ 28, 2020

ក្នុងថ្ងៃនេះ ក្រុមហ៊ុនសែលកាតបានរៀបចំទទួលស្វាគមន៍ដំណើរទស្សនកិច្ចផ្លូវការរបស់រាជរដ្ឋាភិបាល មកកាន់ទីតាំងដំឡើងគ្រឿងបច្ចេកវិទ្យា 5G ដើម្បីបង្ហាញជូននូវអ៊ីនធឺណិតល្បឿនលឿនអស្ចារ្យបំផុត សម្រាប់ដាក់បម្រើជូនអតិថិជននាពេលឆាប់ៗខាងមុខនេះនៅក្នុងរាជធានីភ្នំពេញ។

ដំណើរទស្សនកិច្ចផ្លូវការនេះ ត្រូវបានដឹកនាំដោយអគ្គនាយកក្រុមហ៊ុនសែលកាត អ្នកឧកញ៉ា គិតម៉េង និងអមដំណើរដោយភ្ញៀវកិត្តិយស ឯកឧត្តម ត្រាំ អ៊ីវតឹក រដ្ឋមន្រ្តីក្រសួងប្រៃសណីយ៍និងទូរគមនាគមន៍ (MPTC) និងគណៈប្រតិភូមន្ត្រីជាន់ខ្ពស់របស់រាជរដ្ឋាភិបាលជាច្រើនរូបទៀត។

សមាជិកជាន់ខ្ពស់នៃគណៈប្រតិភូរួមមាន ឯកឧត្តម ខាន់ សារ៉ាក់ រដ្ឋលេខាធិការប្រចាំការ ឯកឧត្តម សុខ ពុទ្ធិវុធ រដ្ឋលេខាធិការ ឯកឧត្តម ជា ម៉ានិត រដ្ឋលេខាធិការ និងជានាយកខុទ្ទកាល័យរដ្ឋមន្រ្តី និងឯកឧត្តម ម៉ៅ ចរិយា ប្រធាននិយ័តករទូរគមនាគមន៍កម្ពុជា។

ក្រុមប្រតិភូបានអញ្ជើញទស្សនាផ្ទាល់នូវការធ្វើតេស្តបច្ចេកវិទ្យា 5G នៅក្រុមហ៊ុនសែលកាត ដោយលទ្ធផលធ្វើតេស្តបានបង្ហាញនូវកម្រិតល្បឿនអ៊ីនធឺណិតដ៏លឿនអស្ចារ្យបំផុត រហូតដល់ទៅ 1.6GB ឯណោះ។

ការធ្វើតេស្តបង្ហាញជូននេះ បានបង្ហាញឱ្យឃើញច្បាស់នូវការត្រៀមលក្ខណៈរួចរាល់ទៅលើផ្នែកបច្ចេកទេស និងការប្តេជ្ញាចិត្តដ៏មុតមាំរបស់ក្រុមហ៊ុន សែលកាត ក្នុងការនាំយកបច្ចេកវិទ្យាថ្មីនេះមកបម្រើជូនអតិថិជននៅក្នុងឆ្នាំ​ 2020។

ឯកឧត្តម ត្រាំ អ៊ីវតឹក បានមានប្រសាសន៍ថា៖ “ខ្ញុំពិតជាមានការចាប់អារម្មណ៍យ៉ាងខ្លាំងជាមួយដំណើរវិវត្តន៍នៃគម្រោងបច្ចេកវិទ្យា 5G របស់ក្រុមហ៊ុនសែលកាត ក្នុងការជួយគាំទ្រដល់គំនិតផ្តួចផ្តើមនៃគម្រោងសេដ្ឋកិច្ចឌីជីថលរបស់រាជរដ្ឋាភិបាលកម្ពុជា” ។

ប្រាកដណាស់ 5G នឹងក្លាយជាបច្ចេកវិទ្យាឈានមុខគេក្នុងការជួយជំរុញសេដ្ឋកិច្ចប្រទេសកម្ពុជា ហើយទន្ទឹមនឹងនោះយើងក៏ត្រូវត្រៀមខ្លួនឱ្យបានរួចរាល់ដើម្បីចាប់យករាល់អត្ថប្រយោជន៍របស់វា និងធានាថាបច្ចេកវិទ្យានេះពិតជាជួយជំរុញដល់ការអភិវឌ្ឍសេដ្ឋកិច្ចជាតិ ក៏ដូចជាជួយលើកស្ទួយដល់វិស័យឧស្សាហកម្មក្នុងស្រុកនិងជីវភាពរបស់ប្រជាពលរដ្ឋយើងផងដែរ”។

យើងចង់ឱ្យប្រទេសកម្ពុជាក្លាយជាគោលដៅលេចធ្លោជាងគេបំផុតផ្នែកបច្ចេកវិទ្យា 5G នៅក្នុងតំបន់អាស៊ាន និងសម្រាប់ក្រុមហ៊ុនទាំងអស់ ដែលមានបំណងចង់ក្លាយជាអ្នកឈានមុខគេក្នុងការប្រើប្រាស់បច្ចេកវិទ្យាដ៏អស្ចារ្យមួយនេះ។

អ្នកឧកញ៉ា គិត ម៉េង ប្រធានក្រុមហ៊ុនសែលកាត បានមានប្រសាសន៍ឱ្យដឹងថា លោកពិតជាមានក្តីសោមនស្សរីករាយបំផុត ដែលបានបង្ហាញនូវសមត្ថភាពនិងល្បឿនអ៊ីនធឺណិតរបស់បច្ចេកវិទ្យា 5G ជូនដល់ឯកឧត្តមរដ្ឋមន្រ្តី និងគណៈប្រតិភូទាំងមូល។

អ្នកឧកញ៉ាបានបន្តមានប្រសាសន៍ទៀតថា៖ “ដំណើរទស្សនកិច្ចនេះ បានបង្ហាញនូវការយល់ដឹងនិងការប្តេជ្ញាចិត្តរបស់ MPTC ក្នុងការជួយគាំទ្រដល់ការនាំយកបច្ចេកវិទ្យា 5G មកប្រើប្រាស់នៅក្នុងប្រទេសកម្ពុជា ក៏ដូចជាឆន្ទៈរបស់ក្រសួងក្នុងការសហការយ៉ាងជិតស្និទ្ធជាមួយប្រតិបត្តិករ ទៅលើបដិវត្តឧស្សាហកម្មដ៏ទំនើបអស្ចារ្យមួយនេះ”។

នេះជាការបើកទំព័រប្រវត្តិសាស្រ្តថ្មីសម្រាប់ក្រុមហ៊ុន សែលកាត និងសម្រាប់ប្រទេសកម្ពុជាទាំងមូល ដោយខណៈនេះ​ក្រុមហ៊ុន រ៉ូយ៉ាល់គ្រុប អាចសម្រេចទស្សនៈវិស័យរបស់ខ្លួនចំពោះការជួយគាំទ្រប្រទេសកម្ពុជា ក្នុងការចាប់យកអត្ថប្រយោជន៍ដ៏សម្បើមលើសលុបនៃវិស័យឌីជីថល។

យើងបានធ្វើការសហការគ្នាយ៉ាងជិតស្និទ្ធបំផុតវាងក្រុមហ៊ុនបុត្រសម្ព័ន្ធទាំងអស់នៅក្នុងក្រុមហ៊ុនរ៉ូយ៉ាល់គ្រុប ជាពិសេសផ្នែក ICT ដោយពួកយើងកំពុងផ្តោតការយកចិត្តទុកដាក់យ៉ាងខ្លាំងទៅលើគុណប្រយោជន៍នៃការផ្តល់សេវាកម្មអ៊ីនធឺណិត (Internet Service Provision)  មាតិកាឌីជីថល (Digital Content) និងសេវាទូទាត់ប្រាក់តាមឌីជីថល Digital Payment តាមរយៈការប្រើប្រាស់បច្ចេកវិទ្យា 5G នៅក្នុងថ្ងៃអនាគត។

ក្នុងនាមជាប្រតិបត្តិករគ្រប់គ្រងដោយជនជាតិខ្មែរ ក្រុមហ៊ុនសែលកាតពិតជាមានមោទនភាពនិងក្តីរំភើបរីករាយបំផុត ដែលក្រុមការងារទាំងមូលរបស់យើងមានឱកាសបានចូលរួមចំណែកយ៉ាងសំខាន់ក្នុងការជួយលើកស្ទួយអនាគតប្រទេសកម្ពុជា។

គួររំលឹកផងដែរក្នុងអំឡុងខែឧសភាឆ្នាំកន្លងទៅនេះ ក្រុមហ៊ុន រ៉ូយ៉ាល់គ្រុបបានរៀបចំពិធីចុះហត្ថលេខាលើអនុស្សរណៈនៃការយោគយល់ជាមួយ MPTC លើការសហការនិងការរៀបចំផែនការសម្រាប់បច្ចេកវិទ្យា 5G និងការអភិវឌ្ឍវិស័យឌីជីថលនៅក្នុងប្រទេសកម្ពុជា៕

អ្នកក៏អាចអានផងដែរ

មិនា, ថ្ងៃ​សៅរ៍ 23, 2024

ទិវាជាតិ វិទ្យាសាស្រ្ត បចេ្ចកវិទ្យា និងនវានុវត្តន៍លើកទី២ ថ្ងៃទី២៤-២៦ មីនា ២០...

មិនា, ថ្ងៃ​សុក្រ 15, 2024

ក្រុមហ៊ុន ខេម ជ្ជីអេសអេម ម.ក ហៅកាត់ថា សែលកាត ជាក្រុមហ៊ុនប្រតិបត្តិករទូរស័ព្ទ...

មិនា, ថ្ងៃ​អង្គារ 12, 2024

កាលពីថ្ងៃទី១១ ខែមីនា ឆ្នាំ២០២៤ ព្រះរាជាណាចក្រកម្ពុជាបានបោះជំហានលើក​ដំបូង ​លើ...

កុម្ភៈ, ថ្ងៃ​សៅរ៍ 17, 2024

ក្រុមហ៊ុន ខេម ជ្ជីអេសអេម ម.ក ហៅថា “ សែលកាត ” ជាប្រតិបត្តិករទូរស័ព្ទចល័តឈានមុ...

សមិទ្ធិផលពានរង្វាន់បណ្តាញសេវារបស់សែលកាត

star មុខងារថ្មី!

មានអ្វីចង់សួរមែនទេ? កាន់តែងាយស្រួល! ឥឡូវនេះលោកអ្នកអាចឆែកមើលសំណួរចម្លើយដែលបានសួរជាញឹកញាប់ថ្មីៗនៅទីនេះ!