ក្នុង​ពិព័រណ៍​អចលនទ្រព្យប្រចាំឆ្នាំ ២០២២ ​រយៈពេល​ពីរ​ថ្ងៃ (Real Estate Expo 2022) ​កាលពី​ពេល​ថ្មីៗ​នេះ​ ដែល​ប្រារព្ធ​ធ្វើ​នៅ​មជ្ឈមណ្ឌល​ព្រីមៀ ខណ្ឌ​សែន​សុខ រាជធានី​ភ្នំពេញ​ សែលកាត ដែលជាម្ចាស់ឧបត្ថម្ភកម្មវិធី បានចែករំលែកឱ្យដឹងនូវតួនាទី និងការប្ដេជ្ញាចិត្តរបស់ខ្លួនក្នុងការចូលរួមធ្វើឌីជីថលនីយកម្មនៅកម្ពុជា ដោយបានលើកឡើងនូវផលិតផល Dual Play និងផលិតផលហ្គេមលើពពក (Cloud Gaming Production) ដែលទើបនឹងបង្ហាញចេញនាពេលថ្មីៗនេះ រួមជាមួយនឹងការបង្ហាញឧបករណ៍ភ្ជាប់ដោយអ៊ីនធើណិតជាមួយដៃគូ Nine Group។

ផលិតផល Dual Play របស់សែលកាត ដែលត្រូវបានប្រសិទ្ធនាមថា Cellcard One គឹជាការរួមបញ្ចូលគ្នានូវប្រព័ន្ធ Wifi និងការតភ្ជាប់អ៊ីនធើណិតតាមបណ្តាញទូរស័ព្ទចល័តនៅក្នុងកញ្ចប់តែមួយ ក្រោមគណនីមួយ និងវិក្កយបត្រតែមួយ។ Cellcard One ដែលអាចប្រើប្រាស់បានទាំងសម្រាប់គេហដ្ឋាន និងអាជីវកម្ម គឺជាគម្រោងសហការដ៏សំខាន់មួយរបស់ក្រុមហ៊ុនរ៉ូយ៉ាល់គ្រុប ក្នុងចំណោមក្រុមហ៊ុនបុត្រសម្ព័ន្ធផ្នែក ICT របស់ខ្លួន ដែលមាន សែលកាត និង Ezecom។ ភាពជាដៃគូរវាងក្រុមហ៊ុនទាំងពីរ ដែលរួមបញ្ចូលគ្នានូវអត្ថប្រយោជន៍នៃបណ្តាញទូរស័ព្ទចល័តដ៏ទូលំទូលាយរបស់សែលកាត និងបណ្តាញខ្សែកាបអុបទិករបស់ Ezecom នឹងអាចធានាបាននូវការតភ្ជាប់បណ្តាញអ៊ីនធើណិត ប្រកបដោយគុណភាពខ្ពស់ទាំងនៅគេហដ្ឋាន កន្លែងធ្វើការ និងក្នុងពេលធ្វើដំណើរ។ កញ្ចប់ទាំងនេះ នឹងមានផ្តល់ជូននូវល្បឿនបញ្ជូនទិន្នន័យដ៏លឿនបំផុតសម្រាប់គម្រោងតាមគេហដ្ឋាន (Home Plan) ខណៈគម្រោងសម្រាប់អាជីវកម្ម (Business Plan) នឹងផ្តល់ជូននូវគុណប្រយោជន៍ខ្ពស់ រួមជាមួយនឹងតម្លៃដ៏សមរម្យបំផុតនៅលើទីផ្សារ។

ស្តង់សែលកាត ក៏បានទទួលស្វាគមន៍នូវអ្នកចូលរួមទស្សនាដែលមានវ័យក្មេងៗផងដែរ ដែលពួកគេសុទ្ធតែមានចំណាប់អារម្មណ៍ចង់សាកល្បងជាមួយ Playgame Cloud បែបថ្មី។ Playgame Cloud ដែល​ត្រូវបានដាក់ឱ្យ​ដំណើរការ​បានរយៈពេល​មួយ​ខែ ​មុន​ព្រឹត្តិការណ៍​តាំងពិព័រណ៍នេះ គឺជាថ្នាល​លេង​ហ្គេម​លើ​ពពក​ដំបូង​គេ​បង្អស់​នៅក្នុង​ប្រទេស​កម្ពុជា។ គោលបំណងនៃសេវាកម្មនេះ គឺដើម្បីអនុញ្ញាតឱ្យការលេងហ្គេមកាន់តែមានបរិយាបន្ន តាមរយៈការប្រមូលផ្តុំនូវហ្គេមដ៏ពេញនិយមបំផុតនៅលើប្រព័ន្ធប្រតិបត្តិការ Android និងម៉ាស៊ីនហ្គេម នៅកន្លែងតែមួយ ពោលគឺអតិថិជនអាចលេងហ្គេមទាំងនេះបាន នៅលើឧបករណ៍ដែលពួកគេមានស្រាប់ ដូចជាទូរស័ព្ទ និងថេប្លេតជាដើម។

Nine Group ដែលជាដៃគូរបស់សែលកាត ផ្នែកឧបករណ៍ភ្ជាប់អ៊ីនធើណិត (IoT) ក៏បានចូលរួមក្នុងសកម្មភាពតាំងពិព័រណ៍នេះដូចគ្នាផងដែរ ដោយបានដាក់តាំងបង្ហាញនូវកាមេរ៉ាភ្ជាប់អ៊ីនធើណិតជាច្រើនប្រភេទ ដែលអាចគ្រប់គ្រង និងចូលប្រើប្រាស់បាន នៅគ្រប់ទីកន្លែងពីទូរស័ព្ទរបស់ពួកគេផ្ទាល់តែម្តង។

លោក Simon Perkins នាយកប្រតិបត្តិក្រុមហ៊ុនសែលកាត បានឱ្យដឹងថា៖ “ពួកយើងពិតជា​រីករាយ​ណាស់​ ដែល​បាន​ចូលរួមនៅក្នុង​ព្រឹត្តិការណ៍​នេះ។ វាបានផ្តល់នូវឱកាសដ៏វិសេសបំផុតមួយ ដែលយើងអាចបង្ហាញជូននូវផលិតផលឌីជីថលថ្មីរបស់យើង ដែលស័ក្តិសមឥតខ្ចោះជាមួយនឹងក្រុមអតិថិជន ដែលយើងចង់ទាក់ទាញឱ្យប្រើប្រាស់សេវាកម្មថ្មីទាំងនេះ។ ទន្ទឹមនឹងនេះ វាក៏បានបង្ហាញនូវឱកាសក្នុងការចងភ្ជាប់ទំនាក់ទំនង សម្រាប់កិច្ចសហការនាពេលអនាគតក្នុងចំណោមក្រុមហ៊ុនជាច្រើនទៀតដែលបានចូលរួម ស្របតាមចក្ខុវិស័យដូចគ្នានៃការធ្វើឌីជីថលនីយកម្មនៅក្នុងសហគមន៍ គេហដ្ឋាន និងអាជីវកម្មរបស់យើង។ អ្វី​ដែលយើងអាចមើលឃើញយ៉ាង​ច្បាស់​នោះ ​គឺ​ចំណាប់​អារម្មណ៍ និង​តម្រូវ​ការ​លើការប្រើប្រាស់​អ៊ីនធើណិត សេវាកម្ម​គាំទ្រដោយអ៊ីនធើណិត និង​មាតិកា​កម្សាន្ត ហើយ​នេះ​គឺជាអ្វីដែលយើងចង់បាន ​ក៏ដូចជា​បន្ត​គាំទ្រដល់​ការ​ផ្លាស់​ប្តូរ​ និង​ការ​ពង្រឹងវិស័យឌីជីថលជូន​ដល់​ជីវិត​ទាន់សម័យបែប​ឌីជីថលរបស់អតិថិជនយើងផងដែរ”។  អ្នកទស្សនា​ជាង​១​ម៉ឺន​នាក់ ​បាន​ចូលរួមនៅ​ក្នុង​ព្រឹត្តិការណ៍​រយៈពេល​ពីរ​ថ្ងៃ​ ដែល​រៀបចំ​ដោយ realestate.com.kh នេះ។ ពិព័រណ៍វិស័យអចលនទ្រព្យនេះ មានវត្តមានចូលរួមដោយក្រុមហ៊ុនអភិវឌ្ឍន៍អចលនទ្រព្យល្បីៗ គម្រោងធំៗ ភ្នាក់ងារ ធនាគារ ក្រុមហ៊ុនផ្តល់សេវាធានារ៉ាប់រង ក្រុមហ៊ុនទូរគមនាគមន៍ និងសេវាកម្មជាច្រើនទៀត ដែលសុទ្ធសឹងតែជាស្ថាប័នមានកេរ្តិ៍ឈ្មោះល្បីល្បាញនៅក្នុងប្រទេសកម្ពុជា៕